لو نفسك فى بشرة منورة وخدود وردي طبيعي، يبقي لازم تجربي وصفة ماسك الكُركم والدقيق وعصير الليمون واللبن.
وصفة هايلة من وصفات الهنود اللي دايماً بنشوفهم مُشرقين ووشهم وردي و بشرتهم صافية.
قبل ما نعرف الوصفة تعالوا نعرف فوايدها:
بتنضف بشرتك من الحبوب والدهون وخلايا الجلد الميت لأنها بتحتوي على الليمون واللبن.
بتدّي لبشرتك اللون الوردي الطبيعي نتيجة إضافة الكُركم.
بترطب البشرة وتفتحها نتيجة إضافة اللبن .
ودلوقتي اعرفي المكونات:
معلقة دقيق أبيض أو شوفان-.
معلقة كركم.
نص عصير ليمونة.
نص فنجان لبن كامل الدسم –حليب-.
الطريقة:
اخلطي الدقيق والكُركم كويس جداً وضيفي عليهم اللبن والليمون لعمل عجينة سهلة الفرد على وشك.
افردي الماسك على وشك لمدة من 15: 20 دقيقة تقريباً، وبعد كدة اغسلى وشك بالمياه الدافية ونشفيه بفوطة نضيفة وخلّي بالك إن ممكن الفوطة تتأثر بلون الكُركم فاستخدمي فوطة أو مناديل سهل تغسليها بعد كدة.
آخر خطوة، اغسلي وشك بالمياه الباردة وامسحي رقبتك ووشك بقطنة مبلولة بمياه ورد. وهتشوفي النتيجة الرائعة..