في أديب فرنسي قال " صداقة امرأتين لا تدوم أمام المنافسة على حب رجل واحد" وطبعا المثل ده صح رغم إن بنات كتير مبتحبش تعترف بالحقيقة دي علنا.
يقال إن صداقة البنات أقوى من صداقة الرجال، وده عشان البنات ملهاش غير بعض وسط غابة الذئاب ووسط مجتمع بيدي الرجل كل حاجة، ولكن الكلام ده مبالغ فيه شوية، يعني البنات صداقتها مش قوية كدة.
ممكن يكونوا بيتكلموا مع بعض أكتر من كلام الأولاد مع بعض، ويمكن تكون البنات بتحكي في أسرار وتفاصيل استحالة الأولاد يتكلموا فيها، ولكن بيبان أوي هشاشة الصداقة دي مع أول مشكلة، أو بمعنى آخر مع أبسط مشكلة، فالأولاد بيعدوا موضوعات كتير وبيكبروا دماغهم ومبيقلبوش على بعض بسهولة، لكن البنات تلاقيها اتنطتط واتنرفزت ويقولوا كلام وحش في حق بعض وتريقة وأسرار تبان لأول مرة.
وده يمكن العيب الوحيد في صداقة البنات أي الفضيحة بعد الخصام، وطبعا الموضوع بيتنيل أكتر لما بتكون الخناقة دي على راجل.
الراجل هنا بيدمر أي صداقة بين اتنين علشان كل واحدة معتبرة نفسها الأنثى إللي مجاش قبلها ولا بعدها وإنها لو خسرت الحرب بكدة تكون زميلتها أفضل منها.
واحنا هنا النهاردة مش بنتكلم إذا كان الموضوع ده صح ولا غلط، ولكن بنتكلم عن حركات البنات وكلامهم عن قوة صداقتهم والشحتفة على بعض والتمثيل رغم الحقيقة غير كدة خالص، والدليل "راجل"...!!!!!