كنت ماشى فى يوم لوحدى وحزنى بيسابق خطايا
مش عارف الحزن منى ولا دى مجرد حكاية
يا حزنى امتى تفارقنى ولا انت معايا للنهاية
يا قلبى ليه حزين؟؟
يا قلبى ليه حزين ده الجرح ده مجرد رواية
لا بايدك كتبت القصة ولا بايدك كتبت البداية
مين يا عالم يسمع منى موالى؟؟
مش هابكى تانى ولا هاشكى تانى ولا هاندم على حالى
لو هاموت يبقى اموت وانا فى برج عالى
حزنى قاتلنى لكن الجرح مسيره بالى
يا فرحى امتى تيجى تنور ليا الليالى؟؟
وشوشت الودع وحاولت اقرا المجهول
اعرف امتى فرحى وامتى الحزن عنى يزول؟؟
مردش عليا الودع !!
يا ترى اخرس ولا خايف يقول؟؟
الفرح عنك بعيد والحزن وياك على طول
مات القلب الابيض فيا والباقى منه سراب
مات من كتر غدر الزمن ومن كتر جرح الاحباب
نبض قلبى وقف مستنى حد يفتح للفرح باب
كل الابواب مقفولة والفرح عنك غاب
يا دنيا شربت منك العذاب الوان
الا اللون الابيض اللى عمره ما بان
يا ترى العيب فيكى ولا العيب فى بنى الانسان
أنا اصم اعمى فى طريق مليان احزان
مش قادر امنع دمعتى والفرح منى هربان
يا عالم قولولى
فرحى فين عليه دلونى؟؟
اخدونى الناس بعيد وعلى شط الاحزان ودونى
لا قادر ارجع تانى ولا البحر وموجه سابونى
الحزن ده طبعى ولا طبع الحياه؟؟
نفسى فى فرحة تكون لقلبى طوق نجاه
قبل ما يموت ويموت الفرح جواه
ويصبح الحزن خليله يندفن وياه
دى قصتى ودى حكاية قلب مات
كان بينادى بعلو الصوت وكان يسمع جوابه سكات
بينادى على فرح يلون عمر منه فات
ده الفرح والجرح دايما خد وهات
الا مع قلبى انا !!
عاش دنيته كلها آآهات !!