كل بنت عندها طموحات وتطلعات في أسلوب حياتها مع شريك الحياة، وأحيانا بتكون الطموحات دي بسيطة جدا لكن تكسف جدا، فمثلا تلاقي البنت ماشية مع خطيبها ونفسها تمسك إيده، ولكنها طبعا هتتكسف تقوله عايزة أمسك إيدك يا حبيبي، وتخاف جدا إنه يقول عليها مش محترمة أو بجحة أو صريحة بزيادة، خصوصا لو كانت علاقتهم بدأت مؤخرا بس.
وبدون شك كل بنت تحب الراجل إللي يدلعها ويغازلها حتى لو زودها شوية، صحيح ممكن تضايق من كلامه بالأسلوب ده، ولكنها عمرها ما هتزعل منه، أصله خطيبها وبعد كام شهر هيبقى جوزها وهي عايزة تطمن إنه عايزها وحاببها وهيموت عليها وعلى جمالها، ولكن المشكلة برضو إنها عمرها ما هتروح تقوله "قولي كلام حلو يا توتو" ساعتها عمره ما هينطق معاها وهيستغرب من أسلوبها الصريح ده.
طب إيه العمل؟ يا ترى المفروض البنت تتكلم بصراحة ولا تخبي مشاعرها جواها، مهما اتكلمنا وطولنا في الكتابة عن الموضوع ده، هنوصل برضو في النهاية إن الصراحة أحسن حاجة ولكن طريقة التعبير بهذه الصراحة هي التي يجب أن تختلف من واحدة لأخرى.
خدي خطيبك أو جوزك تدريجيا لحد ما يعملك إللي انتِ عايزاه، بلاش تحسسيه إنك مضايقة إنه مش مدردح أو إنه مش زي باقي الرجالة، .وتأكدي إن أول خطوة تخليه يقدملك كل حاجة بزيادة هي إنك تحسسيه إنك مش محتاجة حاجة.