في كل واحد منا رغبات داخلية ممكن إنه يتكسف يقولها قدام الناس، ولكن في صفحتنا هنتكلم بصراحة وبوضوح وبدون كسوف.
ومن أكتر الرغبات إللي بنحاول إننا نتجاهلها أمام الأصدقاء، هي الرغبة في وجود صديقة وحبيبة لأي ولد، فهو إما بيتظاهر إن الموضوع مش فارق معاه، أو إنه بيضايق جدا إنه يلاقي ولاد كتير ليهم صديقات وليهم أحلام وطموحات في المستقبل أما هو فمش لاقي حد يسمعه ويهتم بيه ويحبه.
ولكن تظل الرغبة كامنة داخل الولد إنه يتعرف على أي واحدة تحبه وترتبط بيه وتحترمه، وتظل الأسئلة تدور في دماغ الولد خاصة لو لم يمر بتجارب عاطفية وهذه الأسئلة مثل "يا ترى بيقولوا لبعض إيه" "يا ترى الحب بيبقى إزاي" "هي بتحبه ليه" "طب مين إللي ممكن تفكر تحبني وأنا كل الناس مش فاهماني" وما نريد أن نوضحه اليوم هو خطأ هذا الاعتقاد " الارتباط قاعدة وعدم الارتباط هو الاستثناء" فهذه المقولة بعيدة تماما عن الصحة، لأن المصاحبة مش أساسية في حياة الولد، ومش معنى إنه مش مصاحب يبقى كدة هو فيه حاجة غلط أو نقص معين.
الإنسان ممكن يعيش لوحده وبدون شريكة حياة، الحب والارتباط مش كل حاجة في حياة الإنسان في كل مراحل حياته، الحب والمشاركة مطلوبة في مراحل تانية لسة بدري عليها، ومش مطلوب من الولد دلوقتي إنه يدرس ويبني نفسه وكمان يبني قصة حب ومعاه شريكة حياة بيشكل دماغها على هواه وهو أساسا مشغول بتنمية نفسه ومهاراته ودراسته.